Gleðilega hátíð.

Gleðilega hátíð.

Sjómannadagur er hátíðardagur sjómanna, hann er dagur fagnaðar og gleði, en einnig er hann minningardagur þeirra sem farist hafa á sjó og ættingja þeirra sem eiga um sárt að binda.

 Sjóferðabæn.

Í nafni Guðs, föður, sonar og heilags anda. Almáttugi Guð, ég þakka þér að þú hefur gefið mér líf og heilsu svo ég get unnið störf mín í sveita míns andlits. Drottinn minn og Guð minn. Þegar ég nú ræ til fiskveiða og finn vanmátt minn og veikleika bátsins gegn huldum kröftum lofts og lagar, þá lyfti ég upp til þín augum trúar og vonar og bið þig í Jesú nafni að leiða oss á djúpið, blessa oss að vorum veiðum og vernda oss, að vér aftur farsællega heim til vor náum með þá björg sem þér þóknast að gefa oss. Blessa þú ástvini vora, og leyf oss að fagna aftur samfundum svo vér fyrir heilags anda náð samhuga flytjum þér lof og þakkargjörð. Ó, Drottinn. Gef oss öllum góðar stundir, skipi og mönnum í Jesú nafni. Amen.

Trúin hefur verið sterk í íslenskum sjómönnum í gegnum aldirnar.

Biblían geymir nokkrar góðar sjóferðarsögur, til dæmis sagan af Jónasi spámanni og raunum hans, og sagan af lærisveinum Jesú þegar þeir efuðust um borð í bátnum og frelsarinn hastaði á vindinn og lægði sjóinn, um það má lesa í matt. 8. 23-27 svo er í postulasögunni sagt frá því þegar Páll postuli lenti í miklum sjávarháska. Eins er kirkjunni oft líkt við skip.